Lufta ndaj krimit te organizuar

Titulli: Lufta ndaj krimit te organizuar Wed Mar 19, 2008 12:20 pm

Moratoriumi antiskaf ka dhënë rezultate, duke e ndaluar plotësisht trafikun klandestin

Ndjekje penale për funksionarët që shkelin ligjin

Sekretari i Përgjithshëm i Këshillit të Ministrave, Gjergj Lezhja, deklaroi dje se askush nga funksionarët e shtetit nuk mund të mbetet i imunizuar nga ndjekja penale. Sipas tij, lufta kundër korrupsionit ka qenë prioritet i qeverisë. "Lufta kundër korrupsionit ka qenë dhe mbetet prioritet i qeverisë. Kushdo e ka të qartë se askush nuk mund të mbetet i imunizuar nga ndjekja penale, pavarësisht funksionit që ai mban", është shprehur ai. Një deklaratë të tillë, sekretari i Përgjithshëm i Këshillit të Ministrave e ka bërë gjatë një seminari me temë "Zhvillimi i Strategjisë Kombëtare", i organizuar nga Instituti për Demokraci dhe Ndërmjetësim dhe Qendra për Kontrollin Demokratik të Forcave të Armatosura (DCAF). Në këtë aktivitet kanë marrë pjesë përfaqësues të qeverisë, parlamentarë, studiues të fushës, etj. Lezhja nënvizoi se qeveria tregoi një vullnet të madh në luftën kundër këtyre fenomeneve. Sipas tij, vetëm në dy vjet janë goditur 140 grupe kriminale dhe persona. Sekretari i Përgjithshëm i Këshillit të Ministrave theksoi se një gjë e tillë është arritur edhe në sajë të bashkëpunimit me partnerët ndërkombëtarë. Ai theksoi se krimi i organizuar korrupsioni dhe rendi publik përbëjnë një nga sfidat më të mëdha të kësaj qeveria. "Në harkun kohor të dy viteve u arrestuan qindra persona në kërkim, u goditën mbi 140 grupe kriminale dhe persona deri atëherë të paprekshëm u vunë para drejtësisë, në sajë dhe të bashkëpunimit me partnerët ndërkombëtarë. Ndonëse lufta kundër krimit është një luftë e vazhdueshme, sot mund të thuhet pa frikë se në vend sundon ligji dhe shteti i së drejtës", pohoi sekretari i Përgjithshëm, duke bërë të ditur se Shqipëria aspiron të jetë një faktor stabiliteti dhe paqeje në rajon e më gjerë. Ndërsa theksoi se qeveria është kundër krijimit të krizave dhe konflikteve rajonale, si dhe kundër zgjidhjes së tyre me anë të forcës. "Vendi ynë ka kaluar një periudhë të trazuar në këto 17 vjet tranzicioni, duke kaluar nga një shoqëri totalitare në një shoqëri demokratike, me institucione të konsoliduara e një shtet të së drejtës, ku respektohen dhe garantohen të Drejtat dhe Liritë themelore të Njeriut", është shprehur Lezhja. Më tej, ai deklaroi se Shqipëria ka dy vjet që është kthyer në një vend me institucione demokratike të zgjedhura në mënyrë të lirë e legjitime, duke u shndërruar nga një konsumuese në një prodhuese të sigurisë. "Qeveria shqiptare beson se integrimi në strukturat ndërkombëtare të sigurisë kolektive përbën mënyrën më të mirë të forcimit të sigurisë së vendit dhe ka për qëllim krijimin e paqes dhe stabilitetit në rajon", tha ai duke treguar se qeveria ka marrë një sërë masash për forcimin e sigurisë kombëtare, që para ardhjes së saj në pushtet. Një vëmendje të veçantë, theksoi ai, qeveria po u kushton formave të sofistikuara të krimit, sidomos atij ekonomik, pastrimit të parave dhe formave të tjera të këtij krimi, që janë sfida e të ardhmes e autoriteteve të zbatimit të ligjit. Një tjetër përpjekje e qeverisë, theksoi Lezhja, është dhe kalimi i paligjshëm i kufirit, madje dhe përdorimi i territorit të Shqipërisë si tranzit për emigrantët ilegalë. "Moratoriumi 3-vjeçar antiskaf ka dhënë rezultatet e tij, duke e ndaluar këtë fenomen pothuajse plotësisht", tha ai. Gjithashtu, sekretari i Përgjithshëm i Këshillit të Ministrave tha se qeveria ka punuar në mënyrë intensive edhe për konsolidimin e institucioneve dhe instrumentave të sigurisë. Madje ai e konsideroi një gjë të tillë si arritje të qeverisë, pasi në këto dy vjet nuk ka patur asnjë akt terrorist. "Vitet e fundit nuk ka asnjë akt terrorist të kryer në Shqipëri. Ne jemi tepër aktivë në angazhimet tona, së bashku me koalicionin ndërkombëtar kundër terrorizmit. Ushtarët tanë shërbejnë në Afganistan, Irak, etj., duke kontribuar për paqen", vijoi ai. Përsa i takon integrimit euroatlantik, sipas tij, Shqipëria ka arritur suksese të dukshme. Ndërsa vlerësoi si arritje edhe reformimin e plotë të Forcave të Armatosura dhe arritjen e nënshkrimit të Marrëveshjes së Stabilizim-Asociimit. "FA janë vendosur nën kontroll të plotë demokratik dhe janë në rrugën e reformimit të plotë. Qeveria shqiptare pret që në Samitin e Bukureshtit të marrë ftesën e anëtarësimit në NATO. Po ashtu, një vit më parë, qeveria nënshkroi MSA-në me BE-në dhe procesi i ratifikimit të kësaj marrëveshjeje me parlamentet e vendeve anëtare po ecën në mënyrë të kënaqshme", përfundoi sekretari i Përgjithshëm i Këshillit të Ministrave.

Titulli: Re: Lufta ndaj krimit te organizuar Wed Mar 19, 2008 12:20 pm

Korrupsioni, përhapje të gjerë në Shqipëri
Komisioni Evropian, kritika Shqipërisë për korrupsionin, krimin e organizuar dhe mungesën e reformave

BRUKSEL- Shqipëria mbetet në të njëjtën "zonë gri", në vlerësimin vjetor të Bashkimit Evropian. Korrupsioni, krimi i organizuar apo reformat e mbetura pezull në sistemin zgjedhor dhe atë të drejtësisë na lënë në të njëjtin pozicion të disfavorshëm në 'sytë" e BE-së, edhe pse ka kaluar një vit i tërë. Megjithëse raporti i Komisionit Evropian për Ballkanin do të bëhet zyrtarisht publik më 6 nëntor, "Balkan Insight" ka mundur të sigurojë dhe të publikojë raportin. Në raportin e këtij viti, Shqipëria vlerësohet si një vend që në vazhdimësi ka luajtur rol konstruktiv për stabilitetin në rajon, por nuk ka të njëjtën performancë pozitive për detyrimet që ka marrë përsipër të realizojë, gjatë rrugës drejt integrimit në BE. Komisioni Evropian e konsideruar klasën politike shqiptare si të papërmirësuar, për shkak të kulturës demokratike që dominon në vend. "Partitë politike kanë treguar mungesë vullneti për të bashkëpunuar në vazhdimin e reformave, veçanërisht në fushën elektorale dhe të drejtësisë",-thuhet në raportin e këtij viti të Komisionit Evropian.

***

Gjithashtu theksohet se për reformën në drejtësi është bërë një progres fare i vogël gjatë vitit 2007, ndërkohë që sistemi i drejtësisë ka funksionuar në standarde të ulëta, për shkak të korrupsionit, mungesës së pavarësisë, transparencës dhe efiçencës. Lufta kundër korrupsionit dhe krimit të organizuar, sipas Komisionit Evropian ka qenë në fokus të lidershipit shqiptar, megjithatë, korrupsioni mbetet gjerësisht i përhapur në vend. Edhe në rastet kur policia ka pasur vullnetin t'i kundërpërgjigjet krimit, përpjekjet kundër krimit të organizuar mbeten të lëna në mes nga korrupsioni dhe një program i dobët i mbrojtjes së dëshmitarëve të drejtësisë. Raporti i Komisionit Evropian vëren gjithashtu se Tirana ka vazhduar të investigojë dhe çojë para akuzës të implikuarit në trafikimin e qenieve njerëzore, si dhe kontrollet e kufirit janë forcuar. Gjithsesi, Shqipëria vazhdon të mbetet një vend i rëndësishëm tranziti për trafikun e njerëzve. Shoqëria civile përshkruhet po kaq e dobët sa edhe performanca e lidershipit politik shqiptar. Përfaqësuesit e saj nuk përfshihen mjaftueshëm në iniciativa vendimmarrëse, ndërkohë që shfaqin mungesë burimesh, kapacitetesh dhe aftësish në çështje të ndryshme.

***

Përsa i përket çështjeve të brendshme dhe detyrimeve ndërkombëtare, në raport thuhet se Shqipëria vazhdon të mbajë marrëdhënie të mira me vendet e tjera të Ballkanit dhe vendet fqinje të BE-së. Tirana është vlerësuar gjithashtu për qëndrimin konstruktiv në negociatat për çështjen e statusit të Kosovës. Një vlerësim pozitiv vjen nga BE për rritjen ekonomike. Komisioni Evropian vlerëson se është ruajtur stabiliteti makroekonomik, edhe pse borxhi i jashtëm është shtuar për shkak të krizës në sektorin energjetik. Edhe pse i është dhënë një notë pozitive rritjes në terma makroekonomikë, Komisioni Evropian thekson se ekonomia e tregut në Shqipëri ende nuk funksionon qetësisht.

Titulli: Re: Lufta ndaj krimit te organizuar Wed Mar 19, 2008 12:21 pm

Sollaku, kupola e krimit, kthehet në PS !!!!
Bashkë me të, edhe Ilirian Celibashi shfaqet në Fondacionin “Qemal Stafa” si përfaqësues i djemve që ishin më shërbim për të vjedhur zgjedhjet e për të mbyllur dosjet e krimit e tani janë pranë të majtës për të kërkuar mbrojtje. Të dyja palët kanë ende nevojë për njëri-tjetrin, dhe Edvini ka gati shpejt e shpejt postet, pasi koha nuk pret, sepse drejtësia rrezikon të zbardhë dosjet e të zbulojë horrllëqet

Në stilin e guerrilasve të Luftës Dytë Botërore dhe gjegjësisht të shokut Qemal Stafa, (i cili asokohe sapo ishte kthyer nga Vora, kish raportuar tek Enveri dhe do të nisej sërish atje, por që fatkeqësisht e prenë në besë dhe e vranë pas shpine të tijtë), në një tryezë për të diskutuar gjoja hallet e Drejtësisë, u tubuan guerrilasit socialistë të të njohurve si 99-sha. Por tashmë tryezën brenda Shtëpisë së Partisë e kryesonte qemalstafisti junior Sajmir Tahiri. Pranë tij, si gjithmonë qëndronte “Vasil Shantoja” i PS Fatmir Xhafa, krahas të cilit ndodhej “proletari” i thekur që në këtë mbledhje bëri Gogo Nushin, i famshmi Theodhori Sollaku. Ndërsa “ideologun Koço Tashko mori ta bëjë Luan Omari. Në mes spikaste ai që duket se e njihte më mirë terrenin e vrasjeve për ideal, i mbiquajturi “mbrojtësi i kauzës”, Theodhori Sollaku, ish-kryeprokurori që për më shumë se 5 vjet garantoi vjedhjen e qetë të pasurisë së popullit nga mëngjërashët pushtetarë. Diku më tutje ishte Ilirian Celibashi, krimineli zgjedhor, i cili pas shërbimeve që i kreu në të njëjtën kohë mazhorancës mëngjërashe hajdute kthehet në shtëpi për të kërkuar haraçin. E bukur hapje me fytyra të reja: thjesht mbledhje e djemve të shkuar me shërbim, si dikur eksponentët e Sigurimit në emigracion, si dëshmi të qarta se e gjitha ka qenë një skemë për të mbrojtur shpërdorimet e kryebashkiakut socialist e tani të gjithë së bashku janë në një start të ri, për të ndërtuar një karakatinë që do të kërkojë të nxjerrë përfitime të reja në kurriz të taksapaguesve.
Që të gjithë këta thanë gjepura, prezantuan një socialdemokrat gjerman dhe i qanë hallin sistemit të Drejtësisë. Në stilin dhe modelin e OJQ-ve majtiste, në vend të platformave konkrete të parashpallura me të pallura nga Edvini nëpër katundet e Shqipërisë, ata ngritën dhe ulën si gjithmonë tryezën e radhës, sipas huqit të vjetër të mbledhjes dhe derdhjes së tryezë pas tryezash, por tashmë jo më me ujë, bukë, kripë e qepë, si shokët partizanë, por me ujë të gazuar dhe qerasje të tjera në formë koktejli, tek mblidhen kokë më kokë dhe i qajnë dertet hallemadhes Shqipëri.
Kësisoj, kultura e institucioneve ligjbërëse dhe politikëbërëse, prej tyre është zëvendësuar me kulturën e pallavrave ojëqëiste pa bukë dhe me fjalë të mëdha, por me torbën bosh.
Edhe Theodhori Sollaku, që bëri sikur trajtoi tema të mëdha, nuk tha gjë tjetër veçse artikuloi pyetjen retorike nëse duhej prekur apo jo Kushtetuta, lidhur me sistemin gjyqësor, apo ndryshimin e ligjit organik actual, dhe në fund s’bëri tjetër veçse lëshoi piskamën e vajtimit me ligje, teksa zbuloi se problemi më i madh i këtij sistemi paskësh qenë kohëzgjatja e mandatit të Kryeprokurorit.
Dhe kur të gjithë prisnin se çfarë do të artikulonte ky “Profesor i së Drejtës”, i vetëshpallur si ekspert i nivelit të lartë akademik dhe që ish betuar se pas largimit nga Prokuroria e Përgjithshme do të marrej me shkencëra, akademizma dhe jurispridencëra elitare, u pa se me vete në çantën e madhe që dikur ia mbante Visha me Nezën, kish marrë grepat e peshkimit dhe një kutizë me krimba.
Por edhe Fatmir Xhafa, personazh proverbial ky që, më shumë se të gjithë politikanët, ka lakuar termin “drejtësi”, jo vetëm që nuk tha gjëkafshë, por e konsideroi kontribut të madh teorik përsiatjen e pafundme dhe vajtimin për gjoja gjendjen e rëndë të këtij sistemi, pa dhënë asnjë argument.
Edhe guerrilasi tjetër që vjen nga radhët e rinisë eurosocialiste, Damian Gjiknuri, në të gjithë ligjëratën e tij pa kokë dhe këmbë, nuk bëri tjetër veçse përqasi si gjetje të stërmëdha “dy zbulime…”: i pari ishte se tashmë sistemi i Drejtësië paskërka “nevojë imperative”, sipas tij, dmth. më shumë se kurrë për një “reformë tërësore…,; ndërsa zbulimi i dytë i madh i tij isdte se ky sistem u kërcënuaka seriozisht dhe u ndodhkërka në rrezik të madh, për shkak të sulmeve të politikës dhe synimeve të saj për ta shtënë në dorë.
Por ky mendimtar i shquar, me sa duket i ruajti si sekrete “zgjidhjet”, dhe rekomandimet që kishte për t’i bërë të padëmshme dhe efektive sulmet e politikës dhe reformimin e sistemit, teksa nuk dha asnjë alternativë, por mesa duket i ruajti ato për t’ia dhënë si draft në dorë personalisht kryetarit të madh Edvinit, sapo të kthehet nga Berlini ku ka vajtur të marrë si hajmali ndonjë copë tullë të mbetur nga muri që ndante dy blloqet. Edhe studiuesi i madh Gent Ibrahimi, lëvizi me dhjetëra herë gjyslyqet me numër plus 1 minus 1 më në fund konkludoi se sistemi mi drejhtësië ka nevojë oër metodologji shlkencore dhe për parime universale.
Edhe juristi i “shquar” Luan Omari qe deri më tash ka hedhur baza juridike për organizimin edhe funksionimin e pushtetit popullor enverist në Shqipëri dhe drejtësisë kooperativisto-socialiste, nuk bëri gjë tjetër vecse zbulimin e madh sipas të cilit pavarësia e gjyqësorit është shumë e rëndësishme në rëndësinë e saj, dhe se KLD-ja, duhet të ketë më shumë tufëza dhe arëza për të zhvilluar aktivitetin e saj, për përmirësimin e ushqimit të popullit. Më pas profesori i madh zbuloi se agjencia hetimore nuk duhet të jetë nën urdhërat e Ministrisë së Brendshme se përndryshe ky propozim dhe zbulim i madh i PS do të vejë dëm dhe do të shpërdorohet nga policia e qarkullimit rrugor. Më pas ai kërkoi fuqizimin e rolit të prokurorit në sistemin e ri të drejtësisë sipas shembullit të prokurorit të kohës së diktaturës që ndodhej në varësinë e Kadri Hazbiut dhe Fecor Shehut dhe që bëntë dordomuz-dajak-vërtitësin apo dajakun për drejtësi për të kualifikuar veprat penale mbi kokat dhe kurrizet e armiqve, ndaj të cilëve kërkonte dënime kapitale në mbrojte të vijës së partisë dhe pushtetit popullor. Edhe ish ministri socialist i Drejtësisë në qeverisjen e stabilitetit Aleks Luarasi në fjalën e tij konkludoi se para se të bëhej reforma në drejtësi duhej që patjetër të bëhej në klasën politike me qëllim që t’i shpëtojmë vajjtes së ankesave në Strasburg pasi sipas tij i ulet autoriteti Shqipërisë socialiste. Më pas në një asrsyetim rokambolesk, duke shfrytëzuar teorinë e logjikës juridike të mushkarëve, Luarasi mundi më në fund të bindte të pranishmit për lidhjet logjike dhe organike midis nevojës për reformë në drejtësi dhe dorëheqjes së Sabit Brokajt nga politika. Edhe Ilirian Celibashi në rolin e analistit të madh dhe të hulumtuesit të zhvillimeve demokratike e të atyre në sistemin e drejtësisë, bëri zbulimin unikal sipas të cilit e kishte të pamundur të përcaktonte se cili do të ishte në të ardhmen Kryetari i Gjykatës Kushtetuese, i Gjykatës së Lartë apo i KLD-së. Me këtë zbulim të këtij ngërçi të madh të drejtësisë shqiptare ai gati sa nuk kuptoi se kish zbuluar se si juristi i madh si avokat dhe si gjyqtar i shquar, nuk e shihte më veten jo si kryetar i KQZ por as në tre postet, të cilëve u faturoi zbulimin. Duke dëshmuar me këtë se ishte pikërisht koncepti i dëmtuar pakthyeshmërisht i mospërcaktimit të pozitës së karrierës në sistemin e drejtësisë dhe i rregullave të saj që e pengonin të kapte majat e institucionit e të sistemit, me të njëjjten lehtësi si në kohën e PS kapi postin e zv/ministrit të Brendshëm dhe kreut të KQZ-së. Me argument të mallëngjyer, Celibashi la të kuptohej se nuk kishte të mundur që t’i paraqiste tryezës draftin e tij të reformës ngaqë e kishte harruar sipër pianos. Edhe avokait Fatmir Brraka, i qau hallin sistemit të drejtësisë që nuk po reformohej për shkak se kish nënvlerësuar sekserët e vendimeve gjyqësore, bash në këtë armatë ku shumica e parave që blejnë vendime gjykatash në favor të klientëve më të pasur, armatë që ka trefishin e ushtarëve të të gjithë nëpunësve të drejtësisë në hallkat e sistemit. Me sa duket Braka konsideroka reformë hartimin dhe amendimin e neneve të kodit penal për trafikantët dhe përdhunuesit për të cilët ai sugjeron dënime më të lehta që konvertohen në para, vila dhe pasuri të patundshme për të dhe sojin e tij. Analizën e sukseseve dhe rezultateve të “shkëlqyera” të saj do të bëjë komiteti central i partisë në mbledhjen më të afërt të aktivit apo në ndonjë konferencë ku përvec udhëheqjes do të jetë të pranishëm shokët e Internacionales. Dashte zoti qe te jene pasardhës te Miladinit dhe Dushanit.

» Dhuna ndaj grave