Lajme ekonomike

Titulli: Lajme ekonomike Wed Mar 19, 2008 11:59 am

Komisioni i Komuniteteve Europiane, 6,8 milionë euro për Shqipërinë

Këshilli i Ministrave miratoi dje vendimin “Për miratimin në parim të marrëveshjes financiare ndërmjet Këshillit të Ministrave të Republikës së Shqipërisë dhe Komisionit të Komuniteteve Europiane, për programin vjetor të veprimit të fqinjësisë “Cards 2004”. Sipas kësaj marrëveshjeje, ndihma financiare e BE-së në mbështetje të procesit të Stabilizim-Asociimit, përveç programit Cards kombëtar për Shqipërinë, përfshin dhe asistencën që BE-ja u ofron vendeve fqinje nëpërmjet programeve Interreg, të cilat financohen nga Fondi Europian i Zhvillimit Rajonal. Kjo marrëveshje financiare mbulon financimin për vitin 2004, duke vënë në dispozicion për vendet e Ballkanit për të gjitha programet e fqinjësisë shumën prej 15 milonë eurosh. Duke iu referuar ndarjes së fondit të të gjithë programit të fqinjësisë për vitin 2004, Shqipëria përfiton 6,8 milionë euro. Periudha e zbatimit të marrëveshjes financiare fillon me hyrjen në fuqi të kësaj marrëveshjeje dhe përfundon më 31.12.2011. Kjo periudhë zbatimi do të përfshijë dy faza: një fazë operative të zbatimit, e cila do të fillojë në momentin e hyrjes në fuqi të marrëveshjes financiare dhe do të përfundojë në datën 31.12.2009.

Menaxheri i kërkimit pranë Qendrës Shqiptare për Tregtinë Ndërkombëtare, ACIT, mendon se viti 2005 do të jetë i vështirë nga pikëpamja ekonomike

“Zgjedhjet janë një faktor shumë i fortë në Shqipëri dhe ato do të kenë një ndikim gjithashtu të fortë”. Ky është mendimi i Selami Xhepës, menaxher i kërkimit pranë Qendrës Shqiptare për Tregtinë Ndërkombëtare, ACIT. Xhepa është pesimist, përsa i përket gjendjes ekonomike të vitit të ardhshëm. Ai mendon se përveç zgjedhjeve, janë edhe shumë faktorë të tjerë negativë. “Natyrisht, jemi një ekonomi e vogël dhe e menaxhueshme. Ne nuk mund të presim kataklizma”, thotë Xhepa, i cili i përjashton skenarët më të këqinj, megjithëse mendon se gjendemi para një viti të vështirë. “Kur flasim për rritjen ekonomike në kushtet kur nuk i kemi të gjitha të dhënat, detyrohemi të flasim në përgjithësi dhe jo konkretisht. E njëjta gjë ndodh edhe me objektivin e rritjes ekonomike prej 6 %, e cila është kthyer në një lojë kungulleshkash: jo gjashtë, por sa!”
Përsa i përket problemit të zgjedhjeve, edhe ministri i Financave, Arben Malaj, thotë se “vitin e ardhshëm do të shohim nëse administrata publike do të jetë në gjendje të përballet me presionin e politikës”. Malaj pranon se zgjedhjet përbajnë një kosto që do ta paguajnë të gjithë dhe, para së gjithash, bizneset.
Xhepa, nga ana e tij, rendit konsumin si faktorin më problematik për vitin e ardhshëm. “Investimet pritet të jenë të bollshme, por ekonomia shqiptare është ende e orientuar nga konsumi”, thotë ai, duke iu referuar të dhënave të INSTAT-it, që e paraqesin konsumin final në masën 68 % të PBB-së dhe konsumin e popullatës në masën 58 % të PBB-së. Konsumi i popullatës pritet të hasë probleme fillimisht në faktin se rritja e pagave buxhetore dhe pensioneve është e programuar shumë ulët, ndërsa leku i fortë ul vlerën e të ardhurave nga emigrantët. Ulja e konsumit të popullatës është vërejtur gjatë këtij viti edhe në importet, të cilat janë ftohur.
Faktorë të tjerë problematikë për vitin e ardhshëm janë sektori i ndërtimit që rrezikon të mbetet pa punë, si pasojë e mungesës së lejeve të ndërtimit, si dhe sektori i bujqësisë që prej kohësh po zhvillohet ngadalë, si pasojë e mungesës së politikave shtetërore. Ndonëse shifrat zyrtare të turizmit gjatë këtij viti janë shumë optimiste, situata që u pa në bregdet gjatë verës ishte në fakt shumë negative. Për më tepër, turizmi është fusha e parë që preket nga rënia e konsumit të popullatës.

Ngjarjet më të rëndësishme ekonomike që pritet të ndodhin në vitin 2005

Pozitive
· Investimet buxhetore programohen në masën 50 miliardë lekë (400 milionë euro), shifra më e lartë në histori dhe që, për më tepër, pritet të realizohet për shkak të zgjedhjeve.
· Raiffaisen Bank ka deklaruar se dëshiron të akordojë deri në 150 milionë euro kredi për vitin 2005, gjë që përbën një dyfishim të kredisë së re për ekonominë. BSH-ja programon rritje të kreditimit në masën 68 %.
· Termocentrali i Vlorës si dhe naftësjellësi AMBO pritet të sjellin investime të rëndësishme.
· Është programuar privatizimi i Albtelekom dhe ARMO, dy kompanitë e fundit me rëndësi strategjike për vendin.
· Sektori i industrisë pritet të ketë rritje të fortë të furnizuar nga energjia elektrike, çimentoja dhe hekuri për eksport si dhe fillimin e punës në disa miniera të dhëna me koncesion.

Negative ·
Sektori i bujqësisë programohet të ketë një rritje të zakonshme, ende larg shfrytëzimit të resurseve ekzistuese. Situata bëhet edhe më problematike për faktin se gjatë këtij viti, rritja e sektorit të bujqësisë ishte vetëm 3 %, ndërsa disa produkte të rëndësishme si mishi, qumështi dhe vezët kanë arritur në fazën e ngopjes së tregut
· Sektori i ndërtimit pritet të vuajë plotësisht pasojat e numrit të vogël të lejeve të ndërtimit, (67 % më pak gjatë gjatëmujorit të parë të këtij viti), ndërsa disa kompani mund të përfitojnë nga investimet e pritshme të qeverisë për rrugë në gjashtëmujorin e parë.
· Konsumi pritet të jetë në nivele të përmbajtura. Konsumi rezulton i ulët edhe gjatë vitit 2004, (rënia e fortë e importeve), që gjë vjen kryesisht nga ulja e aftësisë paguese të popullatës. (Forcimi i lekut ka ulur përfitimet e shqiptarëve nga remitancat e emigrantëve).

Titulli: Re: Lajme ekonomike Wed Mar 19, 2008 11:59 am

Linjat urbane në Tiranë, shtrenjtohen biletat me dhjete leke

Shtrenjtimi i mjaft shërbimeve dhe çmimeve të produkteve të ndryshme në vend, ndër të cilat edhe hidrokarburet, nuk kishin si të linin mënjanë edhe shërbimin e qarkullimit urban. Kanë qenë përfaqësuesit e këtij të fundit që nëpërmjet Shoqatës Kombëtare të Transportit Urban, kanë paralajmëruar për shtrenjtimin e radhës në biletat e shërbimit urban, duke nisur fillimisht me kryeqytetin. Ultimatumi i është dërguar Bashkisë së Tiranës nga pronarët e këtyre linjave si dhe qeverisë, ku përveç vënies në dijeni kërkohej dhe përmirësimi i kushteve të këtij lloj shërbimi deri në 1 nëntor. Kjo shoqatë, që përfaqëson operatorët privatë të transportit urban në qytetin e Tiranës, përfshin 11 linja shërbimi urban që disponojnë 225 mjete transporti. Kryetari i kësaj shoqate, Ferdinand Ibrahimi, ka deklaruar nëpërmjet një deklarate në lidhje me vendimin e marrë, duke e justifikuar këtë me problemet e shumta që kanë ulur normën e fitimit për këta operatorë. Nëpërmjet deklaratës së tyre shoqata deklaron se “gjendja e transportit urban është keqësuar aq shumë, saqë ndodhemi para faktit dhe ju themi që ky lloj shërbimi kaq i rëndësishëm për pushtetin lokal nuk mund të vazhdojë me këtë gjendje mjaft të rënduar”.

Ankesat e kompanive

Sipas kryetarit të Shoqatës Kombëtare të Transportit Urban, Ferdinand Ibrahimi, “50 për qind e udhëtarëve janë të pajisur me abone dhe libreza invalidi, ndërkohë gjysma tjetër e udhëtarëve lëvizin me bileta”. Por sipas kryetarit të kësaj shoqate, shoqëritë tatohen 20 për qind për biletat e shpërndara ndaj udhëtarëve. ”Ndaj fitimi i këtyre shoqërive është shumë i ulët ose pothuajse fare”, - ka sqaruar Ibrahimi. Drejtuesit e kësaj shoqate kanë sqaruar se institucionet përkatëse duhet të ndërhyjnë menjëherë brenda afateve të përcaktuara, në të kundërt do të merren masa të njëanshme.

Problemet

Faktorët që ndikojnë në përkeqësimin e këtij shërbimi janë të shumta sipas drejtuesve të kompanive private të urbanëve. Një ndër më kryesoret, që ata e kanë “në majë të gjuhës”, është rritja e çmimit të karburantit gati 3 herë më shumë që nga viti 2003, si dhe pjesët e këmbimit të mjeteve dhe vajrat lubrifikantë. Ndërkohë, ka abuzime në prodhimin dhe ndarjen e aboneve si dhe falsifikimin e tyre, në veçanti për abonetë e përgjithshme dhe abonetë e studentëve. Gjithashtu, një problem tjetër për Shoqatën Kombëtare të Transportit Qytetas (SHKTQ) është shtimi vazhdimisht i personave që sipas legjislacionit në fuqi përfitojnë udhëtim falas, për të cilët shoqëritë nuk marrin asnjë lloj subvencioni.

Kërkesat

Shoqata Kombëtare e Transportit Urban, duke nisur nga kushtet e vështira që shkaktojnë probleme dhe humbje në aktivitetin e tyre, kanë kërkuar dy ditë më parë heqjen e aboneve për të gjitha kategoritë e udhëtarëve, duke kërkuar që të punohet me bileta ditore. Gjithashtu ata kanë kërkuar dhe rritje të çmimit të biletave deri në 30 lekë nga 20 lekë që ato kushtojnë aktualisht, duke kërkuar për këtë një vendim të veçantë të Këshillit të Ministrave. Sipas drejtuesve të kësaj shoqate, “situata pa abone të vazhdojë derisa institucionet përkatëse të përgatisin kuadrin ligjor për kategoritë e udhëtarëve që përfitojnë udhëtimin falas dhe mënyrat e subvencionimit të tyre”. Ndërkohë, kryetari i kësaj shoqate ka bërë dhe një kërkesë ndaj Bashkisë së Tiranës në lidhje me infrastrukturën rrugore. “Deri më 1 nëntor, Bashkia duhet të krijojë infrastrukturën e plotë për korsi të veçantë të autobusëve, në mënyrë që të rritet shpejtësia e lëvizjes së autobusëve të transportit urban”, - tha Ibrahimi. Ndërkohë, kjo shoqatë i kërkon Drejtorisë Tatimore, Drejtorisë së Kontrollit të Automjeteve, Drejtorisë së Policisë dhe Policisë Bashkiake, për të mos lejuar subjektet e palicencuara të zhvillojnë konkurrencë të pandershme në linjat urbane.

Titulli: Re: Lajme ekonomike Wed Mar 19, 2008 12:00 pm

Qeveria vendos heqjen e TVSH-së për sektorin e ndërtimit

Qeveria “Berisha” ka vendosur që të lehtësojë disi sektorin e ndërtimit në vend, duke i hequr barrën e taksës së Tatimit të Vlerës së Shtuar për ndërtimet. Kanë kaluar më tepër se tre vjet debate mes ndërtuesve dhe qeverisë për të mos lejuar vënien në përdorim të kësaj takse, që sipas biznesit ishte shkak kryesor për rritjen e çmimeve në këtë sektor. Për këtë arsye qeveria ka vendosur që të lërë në fuqi vetëm variantin aktual të ligjit, i cili takson ndërtimin vetëm nëpërmjet nxjerrjes së vlerës së shtuar, në bazë të situacionit të kostos. Ministri i Financave, Ridvan Bode, ka sqaruar dhe arsyet i dhe qëndrimin e qeverisë në lidhje me këtë çështje. “Qeveria ka vendosur moszbatimin e TVSH-së në ndërtim, pasi nuk e ka asnjë vend në Europë apo Ballkan”, - ka deklaruar ministri i Financave. Ai ka shtuar më tej se, “ajo çka mund të bëjë qeveria është që të studiojë pasojat dhe të marrë masat për parandalimin e atyre gjërave që sjellin një impakt negativ në ekonominë e vendit. Ne i kemi kompensuar efektet e kësaj takse me disa elementë të tjerë në sektorin e ndërtimit dhe jemi në të njëjtin model dhe standard me disa vende të tjera”. Por vendosjen e TVSh-së në masën 20 për qind në sektorin e ndërtimit, e kërkoi me ngulm dy vjet më parë Fondi Monetar Ndërkombëtar. Por një kërkesë e tillë hasi në kundërshtimin e fortë të ndërtuesve, të cilët kërkuan nga qeveria që të mos fuste në veprim një taksë të tillë, pasi ajo do të rriste automatikisht me 20 për qind çmimin e sipërfaqeve të ndërtuara.

KESH-i siguron energji edhe për muajin tetor

Korporata Elektroenergjetike Shqiptare ka njoftuar se ka siguruar energjinë elektrike nëpërmjet importit edhe për muajin tetor 2007. Kjo ka bërë që për drejtuesit e saj, por dhe për qeverinë, të shkarkohet disi ankthi për sigurim të energjisë në çdo fillim vjeshte, edhe kësaj here ishin paralajmëruar kufizime drastike. Sasia e energjisë së blerë për muajin tetor është 8.5 milionë kilovat/orë, ose 1 milion më shumë kilovat/orë se muaji shtator. Burime nga KESH-i bëjnë të ditur se në fund të muajit tetor Korporata pritet që të zhvillojë edhe tenderin e madh për të siguruar sasinë më të madhe të energjisë për dimrin e sivjetshëm. Por rritja e importit nuk pritet që të shoqërohet me ulje të kufizimeve, të cilat kanë vijuar të larta në të gjithë vendin së bashku dhe me faturimet afrofe për qytetarët. Sasia shtesë e energjisë që do të blihet nga importi do të shërbejë kryesisht për uljen e prodhimit vendas, me qëllim që ai të ruhet për kohë krizash në kaskadën e Drinit. Aktualisht në këtë kaskadë prurjet e ujit mësohet të kenë rënë dhe bashkë me to dhe prodhimi, që ka shkuar në 3 milionë kilovat/orë nga 5 milionë që prodhohej më parë, por në dimër konsumi i energjisë pritet që të dyfishohet, në një kohë që prodhimi dhe importi i deritanishëm mbulojnë një sasi të barabartë vetëm me atë të konsumit të stinës së verës.

Doganat, Ministria e Financave largon drejtorin nga konkurset

Drejtori i Përgjithshëm i Doganave nuk do të jetë më kryetar i komisionit që përzgjedh punonjësit, të cilët do të rekrutohen këtej e tutje për të hyrë si pjesëtarë në shërbimin doganor. Me vendimin e fundit të Këshillit të Ministrave, përbërja e komisionit të përzgjedhjes së kandidatëve, për të gjitha kategoritë e nëpunësve të administratës doganore, ndryshohet në mënyrë të tillë, që kryetar i tij nuk do të jetë më kreu i kësaj administrate, por një nga zëvendësministrat e dikasterit të Financave. Nga njoftimi i Departamentit të Informacionit pranë Këshillit të Ministrave mësohet se, “anëtarë të tjerë të komisionit, që përcakton funksionarët e rinj të Doganave do të jenë drejtori i përgjithshëm i Politikave Makroekonomike në Ministrinë e Financave, zëvendësdrejtori i Përgjithshëm Administrativ në Drejtorinë e Përgjithshme të Doganave, drejtori i Personelit dhe Shërbimeve Mbështetëse në Ministrinë e Financave dhe një përfaqësues i Fakultetit Ekonomik”. Ky vendim hyn në fuqi pas botimit në Fletoren zyrtare.

“One stop shop”-i, ende i mbetur në kuadër premtimi për biznesin

Edhe pse qeveria “Berisha” premtoi një sportel unik për regjistrimin e bizneseve të reja në vend, “One stop shop”-i i shumëpërfolur nuk ka nisur si duhet punën. Sporteli i regjistrimit pritej që të ishte një eliminues i burokracive për regjistrimin e bizneseve private, duke shkurtuar kohën në një ditë. Por sipas dëshmive të qytetarëve, regjistrimi aktualisht kërkon 30-60 ditë, nga 24 orë që ishte deklaruar nga qeveria. Në këtë qendër vazhdojnë radhët e gjata të qytetarëve që presin, duke qenë se në të janë grumbulluar të gjitha veprimet që bëheshin më parë në zyra të ndryshme, si veprimet tatimore, të punësimit, sigurimet, e deri te regjistrimi bashkiak. Sipas institucioneve ndërkombëtare, në Shqipëri nevojiten mesatarisht 39 ditë për të hapur një biznes të ri. Kjo është cilësuar si pengesë e dukshme për nxitjen e krijimit të ndërmarrjeve të reja. Shërbimet që ofron aktualisht Qendra janë 20 dhe për të gjitha ato, nga qeveria është caktuar një tarifë fikse, prej 100 lekësh.

Titulli: Re: Lajme ekonomike Wed Mar 19, 2008 12:00 pm

Energjia, importi për 2008-ën, 242 mln euro

"Shi miliardash" për të siguruar energjinë. KESH, sytë nga bankat private për kredi

Shuma e shpenzuar për blerjen e energjisë gjatë këtij viti vendosi rekordin historik, duke qenë disa herë më e lartë se fondet e shpenzuara vitet e kaluara. Ndonëse ende nuk ka një shifër të saktë, mendohet se totali i shpenzimeve për blerjen e energjisë nga importi për 2007-ën do jetë rreth 160 milionë euro. Por për vitin që vjen kjo shifër pritet të jetë edhe më e lartë. Sipas njoftimit zyrtar të Agjencisë së Prokurimeve Publike për tenderin e hapur të blerjes së energjisë, që do të zhvillohet në datën 31 të këtij muaj, fondi limit është parashikuar 242.4 milionë euro, shumë kjo e barabartë me thuajse 25 për qind të totalit të eksporteve vjetore të Shqipërisë. Me anë të kësaj shume, korporata shpreson të sigurojë energjinë për periudhën 1 nëntor 2007, deri në 31 dhjetor 2008. Por për 2 muajt e mbetur të këtij viti vlera e importeve pritet të jetë diku te 40 milionë euro, çka do të thotë se plot 200 milionë euro do të shkojnë për sigurimin e energjisë për vitin 2008. Këto shifra duket se janë bërë problemi kryesor i institucioneve ndërkombëtare që monitorojnë ekonominë shqiptare, që në këtë pikë janë duke bërë presion mbi qeverinë për të rritur çmimin e energjisë. Misioni i fundit i Fondit Monetar Ndërkombëtar vlerësoi ecurinë e ekonomisë shqiptare për vitin 2007, por nuk harroi të përmendë pasigurinë që mund të sjellë kriza energjetike dhe goditjet e mundshme të saj në ekonomi.

19 milionë euro për tetorin

Fondet e mëdha që shpenzohen për blerjen e energjisë nga importi rriten me ritme të larta nga muaji në muaj. Korporata Elektroenergjetike Shqiptare njoftoi se për tetorin vlera totale e importeve të energjisë arrin në mbi 19 milionë euro. Për dy muajt paraardhës, gushtin dhe shtatorin, u shpenzuan respektivisht 17 dhe 16 milionë euro. Në total, të tre muajt të marrë së bashku bëjnë plot 52 milionë euro, ose e thënë ndryshe 6.3 miliardë lekë. Vetëm shuma e prokurimeve të energjisë për këta tre muaj rezulton 1.3 miliardë lekë më e madhe se ajo që qeveria i subvencionoi korporatës për të siguruar energjinë. Zyrtarë të lartë të KESH bëjnë të ditur se korporata do i drejtohet sërish tregut të kredive për të marrë borxh nga bankat private, pasi çmimet e larta të energjisë nuk mund të përballohen edhe në rast se arkëtimet do të ishin në masën 100 për qind dhe humbjet në nivelin zero. Gjendja financiare e korporatës ngre shumë dyshime për të ardhmen, në rast se qeveria nuk do të ndërhyjë për të rritur çmimin e energjisë.

Furnizimi

Korporata Elektroenergjetike Shqiptare njoftoi se ka mundur të sigurojë importin e muajit tetor për energjinë elektrike duke shkarkuar disi ankthin që shoqëron çdo fillim dimri nëse Shqipëria do të mundet të sigurojë sasinë e nevojshme të furnizimit me energji elektrike. Madje, në tetor sasia e blerë për gjithë muajin është mesatarisht 8.5 milionë kilovat/orë në ditë ose 1 milion më shumë se muaji shtator. Në fund të tetorit pritet që korporata të kryejë tenderin e madh, prej të cilit pritet të blejë të gjithë sasinë e nevojshme të energjisë për vitin 2008, megjithëse përvoja e një viti më parë tregoi se kjo ka qenë e pamundur. Fatkeqësisht rritja e importit të energjisë nuk do shoqërohet me ulje të kufizimeve. Burime nga KESH kanë bërë të ditur se sasia shtesë do të shkojë kryesisht për të kompensuar uljen e prodhimit vendas, me qëllim ruajtjen e rezervës në kaskadën e Drinit. Prurjet në Fierzë ditët e fundit kanë ardhur duke u ulur dhe drejtuesit e korporatës po shqyrtojnë skenarin e zvogëlimit të prodhimit vendas deri në 3 milionë kilovat/orë, nga rreth 5 milionë që ka qenë deri më tani. Së bashku me importin, kjo sasi është e barabartë me konsumin e energjisë në stinën e verës, kur në dimër kjo kërkesë dyfishohet.

Titulli: Re: Lajme ekonomike Wed Mar 19, 2008 12:00 pm

Cmimet e karburanteve, rritja nuk ndalet

Tabelat e çmimeve pikat e karburanteve në Tiranë janë retushuar disa herë brenda javës

Çmimet e karburanteve në vend po njohin rekorde të reja historike. Një litër benzine apo naftë e çdo kualiteti tani kushton deri në 8 lekë më tepër, nga sa kushtonte vetëm dy muaj më parë, çka e rëndon më shumë xhepin e konsumatorëve. Drejtpërdrejtë tek drejtuesit e automjeteve dhe makinerive në prodhim, në mënyrë të indirekte shtrenjtimi ndjehet tek hovi që kanë marrë çmimet e mallrave dhe të shërbimeve. Vetë importuesit e karburanteve e paraqesin kapjen e nivelit të shitjeve me çmim afër 1.2 euro për litër të naftës dhe benzinës me ndryshimet negative që kanë ndodhur në tregun ndërkombëtar. Ndërsa në tregun vendas një litër naftë kushton 140 lekë, ndërsa një litër benzinë rreth 143 lekë. Viktor Nushi, kryetar i shoqatës së importuesve të hidrokarbureve thotë se është i pashmangshëm efekti qe vjen nga tregu botëror. Gjithashtu shitësit vendas të karburanteve po përballen me vështirësinë e mungesës së energjisë në distributorët e tyre, duke futur në përdorim gjeneratorët me lëndë djegëse që të mos ndërpresin punën me klientët."Kjo rritje e detyruar e kostos ka rritur çmimin e shërbimit", thotë Nushi. Ndërkohë ekspertët e ekonomisë po e përshkruajnë rritjen e çmimeve në tregun e hidrokarbureve me elemente spekulative. Sipas tyre efekti i tregut botëror nuk mund të vijë kaq shpejt në tregun shqiptar. Gjithashtu ata argumentojnë se importuesit e karburanteve po shfrytëzojnë prej kohësh rritjen e konsumit të naftës e benzinës nga vënia në punë e gjeneratorëve të prodhimit të energjisë elektrike, si nga qytetarët ashtu dhe nga biznesi e institucionet publike.

Titulli: Re: Lajme ekonomike Wed Mar 19, 2008 12:00 pm

Dosja e fundit e CIA-s për Shqipërinë

Sipas raportit të CIA-s, ekonomia e Shqipërisë vazhdon të ketë një rritje me ritme të ulëta. Numri i njerëzve që punojnë vazhdon të jetë ai i një viti më parë me 1. 09 milionë banorë, ndërkohë që në këtë shifër nuk përfshihen 352 mijë emigrantët që janë jashtë vendit. Ndërkohë që në 1000 persona 4.54 prej tyre janë emigrantë.

Importi
Në të dhënat e fundit të CIA-s për nivelin e importeve dhe eksporteve në vend, interesant është fakti që mallrat gjermane kanë pësuar një rritje duke kaluar ato kineze. Kështu niveli i mallrave të importit nga shteti gjerman arrin në shifrat 5.7 për qind, duke kaluar rreth 2 për qind mbi ato kineze. Ndërsa në vend të parë për importin e mallrave mbetet përsëri fqinji ynë, Italia me 32 për qind të mallrave që fut në vendin tonë. Në vend të dytë është shteti grek me 17.8 për qind, duke shënuar një shifër të konsiderueshme. Dhe në vend të tretë renditën mallrat turke. Në vend të parë për mallrat që importojmë renditen makineritë dhe pajisjet e tjera, të cilat zënë pjesën më të madhe. Në vend të dy janë tekstilet dhe në fund janë ushqimet. Ndërsa eksportet, sipas raportit të CIA-s, nuk kanë pasur ndonjë ndryshim të madhe, duke ngelur në shifrat e mëparshme. Ne vazhdojmë të eksportojmë te vendet e tjera prodhime tekstili, metale të ndryshme si dhe prodhime ushqimore si vaj, fruta, cigare. Sipas raportit, vlera e eksporteve të vendit tonë për vitin 2006 ka kapur një shifër prej 763.2 milionë dollarësh. Vendet ku eksportojmë më shumë mallra janë Italia me 67.1 për qind, Mali i Zi 5.7 për qind dhe Greqia me 5.4 për qind.
Etniciteti dhe feja
Ndërsa në të dhënat standarde që nuk pësojnë ndryshime qëndrojnë ato që kanë të bëjnë me etnicitetin dhe fenë. Shqipëria futet në kombet që janë racë e pastër. Kështu, sipas të dhënave të CIA-s, 95 për qind e popullsisë është shqiptare. Më pas vijnë grekë me 3 për qind, të tjerë janë vlleh, romë, serbë, maqedonas e bullgarë janë vetëm 2 për qind. Nga ana tjetër, feja jep një përqindje të pandryshueshme nga ajo që dimë të gjithë. Kështu 70 për qind janë myslimanë, 20 për qind ortodoksë dhe 10 për qind katolikë. Por edhe pse në këtë raport nuk thuhet shpesh, shërbimet amerikane kanë cilësuar se vetëm 45 për qind e shqiptarëve janë praktikantë të fesë. Ndërkohë në lidhje me minoritetin grek, në të dhënat e CIA-s bëhet dhe një sqarim interesant. Sipas saj, në vitin 1989 në statistikat shqiptare ky minoritet përfaqësonte një për qind të popullsisë, ndërsa në vitin 1991 ky numër arriti në tre për qind të popullsisë totale.

431 mijë përdorues interneti brenda dy muajve

Jo më kot bota na quan vend në zhvillim. Në adresën e internetit të Shërbimit Inteligjent Amerikan (CIA), Shqipëria tregon se është një nga vendet që ka rritjen më të madhe të përdoruesve të internetit. Nëse në muajin maj kjo shifër ka qenë 75 mijë, ndërkohë që në muajin tetor kjo shifër ka shkuar në 471 mijë përdorues të internetit. Po ashtu, të dhënat e fundit të "Fact Book" në faqen e CIA-s tregojnë se një rritje ka pasur dhe përdormi i telefonave. Kështu nga 1 milion e 225 mijë që ka qenë numri i përdoruesve të celularëve dy muaj më parë, kjo shifër ka shkuar në 1 milion e 530 mijë të tillë. Ndërsa një nivel rritjeje shënon dhe mesatarja e jetëgjatësisë, e cila, sipas CIA-s, për vitin 2007 shkon në 77.6 vjeç.
Raporti
Të dhënat fundit për Shqipërinë në faqen e internetit të Shërbimit Inteligjent Amerikan tregojnë se brenda një kohe të shkurtët ka ndryshuar dhe numri i popullsisë. Nga 3.6 milionë banorë që ky numër ka qenë për vitin 2006, në tetor të vitit 2007 ky numër është rritur me 523 banorë. Ndërkohë që mosha mesatare është rritur me 0.2 për qind. Ndërkohë që një vit më parë ka qenë 29 për qind. Me 0.3 për qind është rritur dhe jetëgjatësia mesatare e popullsisë, duke shkuar nga 77.3 në 77.6 për qind për vitin 2007.
Edukimi i popullsisë
Sipas të dhënave të dosjes së CIA-s, 86.5 për qind e popullsisë dinë të shkruajnë dhe lexojnë, dhe kjo nis që nga mosha 9 vjeç. Pra, 13.5 për qind e popullsisë sonë është analfabete, një shifër alarmante dhe më e larta e cilësuar në vitet e fundit. Nga këta duken se më analfabetë janë femrat se meshkujt.
Teknologjia
Shqiptarët janë më shumë sesa të dhënë pas teknologjisë. Sipas të shifrave të CIA-s, vetëm gjatë dy muajve të fundit numri i përdoruesve të internetit është shtuar me një shifër prej 396 mijë përdoruesish. Ndërkohë që në muajin maj kjo shifër ka qenë 97 mijë, në muajin tetor në futjen e fundit të informacionit që ka bërë në faqen "Fack Book" CIA, rezulton se ky numër ka shkuar në 471 mijë përdorues.
Telefonat
Sipas raportit të CIA-s, shqiptarët rezultojnë ndër më të pasionuarit pas telefonisë celulare. Vetëm në dy muajt e fundit ky numër është rritur në mënyrë të konsiderueshme. Janë 35 mijë përdorues të celularëve që janë shtuar gjatë periudhës maj-tetor. Një rritje përdorimi ka pësuar dhe telefonia fikse. Nga 225 mijë persona që kanë qenë në raportin paraardhës, kjo shifër ka shkuar në 353 mijë e 600 të tillë.

Titulli: Re: Lajme ekonomike Wed Mar 19, 2008 12:01 pm

Buxheti 2008, shpenzimet rriten me 60 miliardë lekë

Buxheti i 2008-s do të jetë 60 miliardë lekë më i madh se buxheti i këtij viti, duke arritur shumën e 3,8 miliardë dollarëve nga 3,2 miliardë lekë që ishte këtë vit. Ritmet e rritjes do të jenë rreth 19,2 për qind më shumë krahasuar me buxhetin suplementar të vitit 2007. Shpenzimet kapitale janë parashikuar në nivelin 105.9 miliardë lekë, nga të cilat investime me burime të brendshme 38.9 miliardë lekë dhe me burime të huaja 66.9 miliardë lekë. Ky nivel i shpenzimeve kapitale është 51,1 për qind më i lartë krahasuar me vitin 2007, si rrjedhim i rritjes së burimeve të huaja të financimit përmes prezantimit të instrumenteve të rinj të borxhit. Sipas këshilltarit ekonomik të kryeministrit, Sherefedin Shehu, “shpërndarja e investimeve të brendshme është bërë me përparësi në sektorët prioritarë. Prioritete të listës së investimeve janë përzgjedhur ato investime, të cilat kanë qenë vazhdimi i projekteve të mëparshme”. Këtu bën pjesë rruga Durrës-Kukës, aksi Lushnjë-Fier etj., investime që janë strategjike për zhvillimin ekonomik dhe social të vendit dhe në përputhje me programin e qeverisë. Këshilltari Shehu thotë se, “investimet që shoqërojnë projektbuxhetin 2008 janë të kompletuara me një kurrikulum të plotë, me qëllim përzgjedhjen e projekteve të plota, të mirëstudiuara dhe në vlera të mëdha, duke reduktuar copëzimet e tyre, në përputhje me të gjitha procedurat e menaxhimit të investimeve publike”.

Titulli: Re: Lajme ekonomike Wed Mar 19, 2008 12:01 pm

“Tirana Bank”, kredi për shtëpi me zero për qind interes

Tirana Bank” njofton daljen në treg të formës më të re të kredisë për shtëpi, “Kredi për blerje shtëpie”, e cila vjen tek konsumatorët shqiptarë me një ofertë që sjell një ndër normat më të ulëta të interesit në vend. Një këst i ulet interesi, është ndoshta gjëja e parë që çdo konsumator që kërkon kur përballet me format e ndryshme të kreditimit që ofrohen nga banka të ndryshme. “Tirana Bank” ka menduar që të çlirojë klientin e saj nga ky mendim, të paktën për 6 muajt e parë të shlyerjes së interesit të kredisë për shtëpi, me një normë interesi 0 për qind. Pra klienti do të shlyejë vetëm këstin mujor, pa asnjë norme interesi nga ana e bankës për 6 muajt e parë, ndërsa në vazhdim ai do të vazhdojë të paguajë një nga normat e interesit më të ulëta në treg, 3.5 për qind plus Euribor. Kjo konsiston në mbështetjen e të gjithë atyre individëve, çifteve të reja apo familje që kërkojnë të kenë një shtëpi të re, apo të investojnë për të blerë një apartament të dytë, pasi në shumicën e kohës është më e leverdishme të investosh në blerjen e një shtëpie për krijuar një stabilitet familjar në të ardhmen. “Tirana Bank” mbështet këtë iniciativë me këtë formë të re kredie, e cila ka kushte të favorshme jo vetëm në normat e interesit, por edhe kushtet e tjera, si financim 100 për qind i shumës së kërkuar nga klienti, kohëzgjatje të shlyerjes së kredisë 25 vjet, 0 për qind komisione për transferimin e kredisë nga bankat e tjera, e mjaft të tjera. Ndërsa klienti përballet vetëm me kushtet e zakonshme që duhen plotësuar prej tij për marrjen e kësaj kredie, si stabilitetit ekonomik me një pagë të verifikueshme, hipotekë apartamenti, garanci të besueshme nga ana e bankës, një moshë minimale nga 18 vjeç, e të tjera. Kjo formë kredie iu drejtohet të gjithë atyre që kanë ëndërr të kenë shtëpinë e tyre e që janë lodhur duke paguar apartamente me qira, me lehtësira të studiuara për t’ju ardhur ne ndihmë klientëve sipas nevojave të tyre.
Rreth “Tirana Bank”
“Tirana Bank”, anëtare e grupit Bankar të Pireut, nisi të operojë në Shqipëri në shtator të vitit 1996, si institucioni i parë bankar me kapital privat me licencën e një banke universale. Sot kemi një pozicion të fortë në tregun vendas, me 14 për qind të tregut në kredi dhe asete, të cilat kapin shifrat e 516.5 milionë euro (30.07.2007) dhe një total prej 369.4 milionë euro në depozita.

Titulli: Re: Lajme ekonomike Wed Mar 19, 2008 12:01 pm

The Economist për Shqipërinë: Më në fund kohë më të mira

Duket se perëndimi po ndërron përshtypjen e tij për Shqipërinë.

Në një shkrim sensacional nën titullin “Më në fund kohë më të mira” ku i kushtohet zhvillimeve të fundit ekonomike në vendin tonë, shkruhet se një bum i papritur po ndodh kohët ë fundit në këtë vend.
“Nuk është e vështirë të gjesh lajme të këqija në Shqipëri shkruhet që në fillim të artikullit si korrupsioni, shteti i dobët dhe nje krim i forte i organizuar.
Por më tej pohohet se në pese vitet e fundit po ndodhin ndryshime dhe një transformim i papritur.
Vendi i dale nga kaosi i 97 i shkaktuar pas kolapsit te skemave piramidale tani po mbushet me ndërtime te shumta ku apartamente dhe zyra me ngjyra te ndezura po shtrihen net e gjithe Tiranen.
Rruget po shtrihen dhe rikosntruktohen ne te gjithe vendin thuhet me tej. Madje po rilind edhe Vlora, nje qytet kur dikur mblidheshin kurdet e transportoheshin ilegalisht ne Itali.
Ligji antiskaf thuhet ne artikull ka dhene efktivitetin e vet dhe parate e perdorura dikur ne keto trafiqe tani po perdoren ne menyre te ligjshme ne ndertime dhe biznese ligjore.
Ekonomia informale eshte reduktuat dhe ne hotelet dhe restorantet vendit po pushojne mjaft pushues jo vetem shqiptare por dhe nga Kosova dhe Maqedonia.
Stabiliteti i viteve te fundit ka ndikuar ne hapjen e mjaft bankave te huaja, qe ndihmojnë me kredi te ndryshme.
Kur Bashkimi Europian, vijon artikulli vuri kufizime per emigracionin per punësimin ky fakt nuk u prit me shqetësim ne Shqiperi pasi nje numer i madh shqiptaresh jetojne dhe punojne ne perendim.
Mbi 600 mije prej tyre jetojne ne Greqi, me shume se 200 mije ne Itali dhe rreth 200 mije te tjere ne vende te ndryshme. Te gjithe keta emigrante dergojne ne Shqiperi rreth 1 miliarde euro ne vit.
Ka nje angazhim per te goditur krimin e organizuar, thone burime policore, eshte ulur numri i vajzave qe përdoreshin per prostitucion. Duke iu referuar shifrave te papunesise, niveli 15 per qind i saj ne Shqiperi eshte me i larte se ne vendet e tjera Europe, thote “Economist” por jo me shqetësuese se niveli i papunësisë ne Maqedoni dhe Kosove ku ky nivel eshte me i larte.
Por shqetesimi me i madh i shqiptareve thote revista e njohur ekonomike eshte e ardhmja e ekonomise se tyre.
Parate e emigranteve nuk mund te krijojne shume vende pune, nderkaq shqetësuese mbetet edhe sjellja e kryeministrit Berisha i cili qe pas ardhjes ne pushtet ka vene ne kontroll te forte jeten publike ne vend.
Analaistet e “The Economist”?jane te bindur se situate poztive e krijuar ne Shqiperi do te ndikoje per mire ne e gjithe Ballkanin.
“Mirëqenia dhe stabiliteti ne Shqipëri”, përfundon artikulli i “The Economist”, “eshte i rendesishem per kedo ne Ballkan.”

Titulli: Re: Lajme ekonomike Wed Mar 19, 2008 12:02 pm

Taksë e re për importin e botimeve të huaja
Kompania ndërkombëtare e shpërndarjes së shtypit (revistave dhe gazetave), ka kërcënuar se nuk do të dërgojë gazeta dhe revista në Shqipëri pas taksës së re të aprovuar nga parlamenti shqiptar.
Peter Emod, manaxhar i agjencisë në Zyrih, i ka dërguar një letër presidentit të vendit, Bamir Topi duke i kërkuar ndryshimin e ligjit, i cili vendos 20% taksë mbi të gjitha produktet e shtypit të importuara nga jashtë.

Një kopje e kësaj letre i është faksuar edhe zyrës së shtypit.

“Ligji i ri do të detyrojë kompanitë e shpërndarjes të mos dërgojnë më botimet në Shqipëri. Kjo taksë mund ti japë fund edhe shtypit të huaj në Shqipëri” – tha Emod.

Ky ligj mund të ndikojë gjithashtu edhe importin e librave, sipas agjencisë së importit Adrion Ltd.

Shtypi i huaj është ndaluar të vijë në Shqipëri para viteve 1990, por duket se kjo situatë po përsëritet edhe tani me taksat e reja të aprovuara nga parlamenti Shqiptar.

» Lajme Sportive